هما مين و احنا مين
هما الامرا و السلاطين
هما المال و الحكم معاهم
و احنا فقرا و محكومين
حزر فزر شغل مخك
شوف مين فينا بيحكم مين
احنا مين و هما مين
احنا الفعلا البنايين
احنا السنه و احنا الفرض
احنا الناس
بالطول و العرض
من عافيتنا تقوم الارض
و عرقنا يخضر بساتين
حزر فزر شغل مخك
شوف مين فينا بيخدم مين
هما مين و احنا مين
هما الامرا و السلاطين
هما الفيلا و العربيه
و النساوين المتنقيه ..طبعا
حيوانات استهلاكيه
شغلتهم حشو المصارين
حزر فزر شغل مخك
شوف مين فينا بياكل مين
احنا مين و هما مين
احنا قرنفل على ياسمين
احنا الحرب حطبها و نارها
احنا الجيش اللى يحررها
و احنا الشهدا فى كل مدارها
منتصرين او منكسرين
حزر فزر شغل مخك
شوف مين فينا بيقتل مين
هما مين و احنا مين
هما الامرا و السلاطين
هما مناظر بالمزيكا
و الزفه و شغل البلوتيكا
و دماغهم طبعا استيكه
بس البركه فى النياشين
حزر فزر شغل مخك
شوف مين فينا بيخدع مين
هما مين و احنا مين
هما الامرا و السلاطين
هما بيلبسوا اخر موضه
و احنا بنسكن سبعه فى اوضه
هما بياكلوا حمام وفراخ
و احنا الفول دوخنا و داخ
هما بيمشوا بطياررات
و احنا نموت ف الاتوبيسات
هما حياتهم تمضى جميله
هما فصيله و احنا فصيله
حادى بادى يا عبد الهادى
راح تفهم قصد الغنوة دي
لما الشعب يقوم و ينادى
يا احنا يا هما فى الدنيا دي
حزر فزر شغل مخك
شوف مين فينا هيغلب مين
!!!!!!!!!!