بحبنى لخميس ابو العز

معجب بنفسى قوى
وبحب شكلى ف المرايا
وكلامى برضه بعشقه وممكن احكى ف ميت حكايه
أما بقى نفسيتى .. طيب أوى وكريم وسليم أوى
معرفش اجيلك م الطريق الملتوى
أو أعرفك لظروف وغايه

بالاختصار بحبنى
ما انا أصلى ليا زمان معايا بنـتكسر ونتـبنى
ونفتقر و نتـغنى
وننـفرد ونـنحنى
أحداث كتير عشناها يااااااه
متحالفين مع بعضنا ضد الحياه وعمرى ما خنتـنى
وعمرى ما سبتنى للوحده تاكل فرحتى و تهدنى
بقولكم بحبنى
والله لو ينفع لكنت قومت و بوستنى

زمان ..قبل ما اعاشرنى قوى وآخد عليا
قبل ما اتأكد واشوف إخلاصى ليا
كنت شاكك فيا
طبيعى يعنى ان المراهقه تبتدى بجنان شويه
لكن مع الأيام
عرفت جداً إن انا كل اللى ليا
بكيت .. أضمنى
غرقت أشدنى
بعدت .. أودنى
هجرت .. أردنى
غلطت .. كدبت .. شتمت .. سرقت .. فتـنت ..قتلت
ف كل حاله و كل حاجه وكل حوجه بذل نفسى واعزنى
وحياتى عندى بقولكم .. بحبنى
مستغربين من إيه ؟
فيه حد فيكم حبنى أكتر ما حب بعضه
فيه حد فيكم مش زينا برضه ؟

نقلا عن شار يدعى :: خميس ابو العز

زمان ..قبل ما اعاشرنى قوى وآخد عليا
قبل ما اتأكد واشوف إخلاصى ليا
كنت شاكك فيا

يا سلاااااااام
بجد كلام جميل جدا وفكره رائعه
اهم حاجه الواحد يتصافى مع نفسه دى اهم من مليون واحد يصاحبهم
وهيلاقيها احسن من كل الاصحاب

اكيد طبعا طريقة معبرة عن حالة النفس مع الانسان